बिक्रमबाबा मेला सुरू हुँदै

चैत्र,१५ चितवन । आउँदाे चैत्र १६ गतेबाट चितवन राष्ट्रिय निकुञ्ज भित्र बिक्रमबाबा मेला सुरू हुँदैछ । भरतपुर-२३ जगतपुर र कसराको बीच सेक्टर चितवन राष्ट्रिय निकुञ्ज क्षेत्रभित्र लाग्ने एक मात्र विक्रम बाबा मेला तथा पुजा लाइ व्यवस्थित गर्ने बिषयमा निकुञ्ज कार्यालय र मध्यवर्ती उपभोक्ता समिति सहितकाे टाेलिद्वारा विहीबार अनुगमन समेत गरिएकाे छ । 

१५ दिन सम्म लाग्ने बिक्रमबाबा मेला चैतेदशैंलाई लक्षित गरी हरेक बर्ष चैत्र औंसीदेखि पूर्णिमासम्म मेला लाग्दै आइरहेको छ । मेलामा होटल, खुद्रा सामाग्री, कपडा लगायतका स्टलहरु रहनुका साथै बनभोज स्थल समेत रहने गर्दछ । विक्रम बाबाको पूजा परापूर्व कालदेखि थारु जातिले गर्ने भएपनि पछिल्लो समय अन्य जातजातीहरुको पनि यसमा आस्था बढेको देखिन्छ । विक्रम बाबाको दर्शन गर्नाले सन्तान प्राप्ती, सुख लगायत मनोकांक्षा पुरा हुने विश्वास गरिन्छ । चैते दशैंमा हजारौ भक्तजनले विक्रम बाबा दर्शन गर्ने र पशु पंक्षी वली दिने गर्दछन् ।

बिक्रम बाबाको पुजा एक शताब्दी भन्दा पहिल्यै देखि चलिआएको बुझिन्छ । चितवन राष्ट्रिय निकुञ्ज भित्र कसरा दरवार नजिकै बिक्रम बाबाको स्थान रहेको छ । यहाँका आदिवासीहरु थारु तथा बोटे सबै जातिहरुको बाबाप्रति निकै ठूलो श्रद्धा र बिश्वास रहेको छ ।