भगवतीलाई प्लास्टिकको छानो

तानसेन । ऐतिहासिक भगवतीको मन्दिरलाई दुई वर्षदेखि प्लास्टिकको छानोको भरमा जोगाइरहेको छ । नेपाल–अङ्ग्रेज युद्धको इतिहास बोकेको मन्दिरको छानो समयमा मर्मतसम्भार हुन नसक्दा दुई वर्षदेखि प्लास्टिकको त्रिपालले छोपेर राखिएको हो । 

जीर्ण भएर मन्दिरभित्र पानी चुहिएपछि प्लास्टिकको छानो राख्नु परेको मन्दिर व्यवस्थापन समितिले जनाएको छ । आकाशबाट पानी पर्नेबित्तिकै भित्र पानी चुहिएर मन्दिर थप जोखिममा पर्ने अवस्था आएपछि प्लाास्टिकको ओत लगाइएको मन्दिर व्यवस्थापन समितिका अध्यक्ष अशोकमान महर्जनले बताउनुभयो । पानी परेको बेलामा मन्दिरभित्र गएर पूजा गर्न पनि समस्या रहेको उहाँले बताउनुभयो । मन्दिरको मर्मतसुधारका लागि तीनै तहका सरकारसँग बजेट माग गरिएको भए पनि पर्याप्त बजेट पर्न नसकेको समितिका अध्यक्ष महर्जनले बताउनुभयो । मन्दिरलाई पुरानै स्वरूपमा बनाउन करिब पाँच करोडभन्दा बढी बजेट लाग्ने अनुमान गरिएको समितिका सचिव प्रकाश गङ्गोलले बताउनुभयो । 

मन्दिरको छानो चुहिएर मन्दिर भत्किने अवस्था भएकाले त्यसलाई जोगाउन पुरानै स्वरूपमा मन्दिर पुनर्निर्माण गर्ने योजना रहेको उहाँको भनाइ छ ।  उहाँले भन्नुभयो, “सङ्घीय र प्रदेश सरकारबाट पर्याप्त बजेट पर्न सकेको छैन । यो वर्ष प्रदेश सरकारबाट ४० लाख रुपियाँ बजेट विनियोजन भएको तर त्यो पर्याप्त भने छैन ।” दुई सय वर्षअघि तत्कालीन तैनाथवाला कर्णेल उजिरसिंह थापाले भगवतीको मन्दिर बनाएका थिए । विसं १८७१/७२ देखि सुरु भएको नेपाल–अङ्ग्रेज युद्धमा विजयी भएर आएपछि कर्णेल थापाले देवी भगवतीको मन्दिर र महिमा फैलाउँदै प्रचलनमा ल्याएइको थियो । सोही बेलादेखि तानसेनमा भगवतीको मूर्ति तानसेनबजारभरि यात्रा गराउने प्रचलन पनि सुरु भएको थियो ।

युद्धमा सुरुका केही वर्ष दुईतलेको मन्दिर बनाइएको थियो । त्यसपछि भगवतीको मन्दिर तीनतले बनाइएको भए पनि विसं १९९० को भूकम्पपछि पुनः मन्दिर दुईतले निर्माण गरिएको इतिहासविद् निर्मल श्रेष्ठले जानकारी दिनुभयो ।(गोरखापत्र अनलाइन)