लंकुमा जारी महायज्ञमा भोलि सहरी विकास मन्त्री विक्रम पाण्डे आउने

चितवन,४ फागुन । भरतपुर -४,धर्मचोक ,लङ्कु, चितवनस्थित लक्ष्मीवैकुण्ठनाथ मन्दिरद्वारा सञ्चालित श्री वैकुण्ठनाथ परमवैदिक विद्याप्रतिष्ठानम्(गुरुकुलम्)को सुसञ्चालन र सर्वाङ्गीण विकासका लागि बृहत् अक्षयकोष स्थापनार्थ पीठाधीश स्वामी जगन्नाथाचार्यको संकल्पमा जारी श्री लक्ष्मीवैकुण्ठनाथ वैदिक विद्या संरक्षण महायज्ञमा भोलि (फागुन ५ गते) सहरी विकास मन्त्री विक्रम पाण्डे आउनुहुने भएको छ।

महायज्ञको अहिले जारी दोस्रो चरणमा सुप्रसिद्ध कथावाचक ईश्वर कृष्ण महाराजले प्रवचन गरिरहनुभएको छ। १५ दिने महायज्ञको आज तेह्रौं दिन चलिरहँदा अहिलेसम्म नगद र बोलकबोल गरी झन्डै २ करोड ८५ लाख रकम संकलन भएको महायज्ञ सम्पादन सचिव रामचन्द्र सापकोटाले जानकारी दिनुभयो।

देशका प्रमुख सन्त- महात्माहरू,शैक्षिक, राजनैतिक , सामाजिक व्यक्तिहरूको उपस्थिति भइरहेको महायज्ञको आजको कार्यक्रममा शुकदेव भागवत आश्रम गैंडाकोटका उत्तराधिकारी स्वामी लक्ष्मणाचार्य, पूर्व सांसद कृष्णभक्त पोखरेल, गोविन्द कंडेल , त्रिभुवन विश्वविद्यालयका पूर्व रजिस्टार प्रा.डा.भीमराज अधिकारी , गण्डकी नारायणी संरक्षण महाआरती परिषद्का अध्यक्ष प्रेमनिधि भारद्वाज लगायतको उपस्थिति रहेको थियो ।महायज्ञको ६ गते शिवरात्रिका दिन समापन हुँदैछ।