बाह्रवर्षे मकर मेला : त्रिवेणीघाट र आसपासका खोला सरसफाइ शुरु

२ फागुन (रासस) | दैनिकरुपमा घर तथा सार्वजनिकस्थलमा उचित व्यवस्थापन गर्न नसक्दा वर्षांैदेखि बढ्दै गएको फोहरका कारण अस्तब्यस्त बन्दै गएको छ । काभ्रेपलाञ्चोकको पनौती नगरपालिका वडा नं ७ स्थित ऐतिहासिक तथा धार्मिकस्थल त्रिवेणीघाट र आसपासका रोशी खोला तथा पुण्यमाता खोलाको सरसफाइ थालनी गरिएको छ ।

पनौतीमा रहेको ऐतिहासिक तथा धार्मिकस्थल त्रिवेणीघाट र गोरखनाथमा बाह्र वर्षमा लाग्ने मकर मेलालाई लक्षित गरी यहाँ आउने श्रद्धालु भक्तजन र आन्तरिक तथा बाह्य पर्यटकको सुविधाका लागि नागरिक अभियानकर्मीले नगरपालिका र वडा नं ७ कार्यालयको समन्वयमा सरसफाइ अभियानको थालनी गरेका हुन् । सोही मेलालाई लक्षित गरी अहिलेदेखि नै नगरपालिकाभित्र रहेका विभिन्न सङ्घसंस्था, नागरिक समाजको अगुवाइ तथा स्थानीय बासिन्दाले ‘पनौती त्रिवेणी सरसफाइ नागरिक अभियान’ कार्यक्रमको शुभारम्भ गरेका हुन् । सो कार्यक्रममा वाग्मती सरसफाइ अभियानर्की किशोरसिं शाहीले वाग्मती नदीमा सरसफाइ अभियान थालनी गर्दा पनि निकै कठिनका साथ गरेर अहिले यो स्थितिमा आइपुगेको उल्लेख गर्दै शुरुमा थालनी गर्दा आत्तिन नहुने बताउनुभयो ।

पनौतीका नगर प्रमुख भीम न्यौपानेले आफ्नो बासस्थान र कार्यस्थान वरिपरि सदैव सफा राख्छु भन्ने प्रतिबद्धता व्यक्त गर्न लगाउँदै अभियानमा सहभागी हुन सबैलाई आग्रह गर्नुभयो । पुण्यमातामा आफूहरुले फोहर गरेको भए पनि त्यसको शिरबाट नै फोहर गरेर पठाउने भएको हुनाले त्यसको रोकावटको निमित्त बनेपा नगरपालिकासँग कुरा भइरहेको प्रमुख न्यौपानेले बताउनुभयो । आगामी २०७८ सालमा सो मेला लाग्ने छ । त्रिवेणीघाटमा नुहाई त्यहाँको जल उत्तरपट्टी रहेको अग्लो डाँडामा अवस्थित गोरखनाथलाई अर्पण गर्नाले ठूलो पुण्य मिल्ने जनविश्वास रहेको पाइन्छ । राजा प्रताप मल्लले विसं १७२७ मा रानीपोखरी बनाइसकेपछि विभिन्न तीर्थस्थलको जल राख्दा पनौती त्रिवेणीघाटको जल ल्याइराखेको कुरा यहाँस्थित शिलालेखमा उल्लेख छ ।