“देवघाटधाम गण्डकी परिक्रमा हजारौ भक्तहरुको सहभागिता

विश्वकै प्रसिद्ध धार्मिक पर्यटकिय गन्त्वय देवघाटधाममा यस वर्ष पनि “देवघाटधाम गण्डकी परिक्रमा महोत्सव सम्पन्न् गरिएको छ । बैकुण्ठ चतुर्दशीका दिन मंगलबार सम्पन्न“देवघाटधाम गण्डकी परिक्रमा महोत्सवको  पैदलयात्रा हजारौ भक्तहरुको  सहभागीता रहेको थियो । चतवन ः चितवन, तनहुँ र नवलपुर जिल्लामा पर्ने देवघाट तीर्थस्थल को  २६.५किलोमिटर दूरी क्षेत्र यस परिक्रमामा गरिएको थियो । देवघाट धामको पर्यटन प्रवद्र्धन गर्ने उद्देश्यले आयोजीत यस महोत्सव  मंगलबार बिहान देवघाटको वेणीमा विधिपूर्व

क पूजा गरी महोत्सव सुरु गरिएको थियो  ।

नेपाल सन्त समाजको आह्वानमा देवघाट क्षेत्र विकास समिति र देवघाट गाउँपालिकाको समन्वयमा आयोजीत यस महोत्सवको हरिहर सन्यास आश्रमका पीठाधीश ज्ञानानन्द सरस्वती  महाराज र महेश सन्यास आश्रमका पीठाधीश रमणानन्द गिरीजी महाराजले उद्घाटन गर्नु भएको थियो । विहान ७ वेणी संगम  देवघाटधामबाट शूरु भएको यस परिक्रममा   तनहुँतर्फ पशुपतिनाथ मन्दिर, गङ्गा मन्दिर, अघोर आश्रम, गलेश्वर आश्रम (सिद्धेश्वर मन्दिर), दुर्गा पाञ्चायन मन्दिर, चक्रवर्ती आश्रम (मणिमुकुन्देश्वर मन्दिर), महेश सन्यास आश्रम (विद्येश्वर मन्दिर), अभय सन्यास आश्रम (रामेश्वर मन्दिर), हरिहर सन्यास आश्रम (हरिहर मन्दिर), राम मन्दिर, लक्ष्मीनारयण मन्दिर, देवघाट पुलको मुख (गणेश मन्दिर, केदारेश्वर मन्दिर र बद्रीनाथ मन्दिर) को परिक्रमा गरिएको छ ।

चितवनतर्फ देवघाट बसपार्कको सङ्कल्पेश्वर हनुमान मन्दिर, छेदेन थर्वालिङ गुम्बा, विश्वशान्ति यज्ञशाला मन्दिर, राम मन्दिर, राधाकृष्ण मन्दिर, लक्ष्मीनारायण मन्दिर, सीताराम संस्कृत मावि, कन्या गुरुकुल, धर्मदर्शन आश्रम, योगी नरहरिनाथ गौशाला बागिश्वरी मन्दिर, आँपटारी दियालो बङ्गाला चोक, गौरेश्वर शिव मन्दिर पोखरा बसर्पाक, राजयोग सेवा केन्द्र नारयणगढ, हरिहर मन्दिर नारयणगढ, श्रीराम मन्दिर पुल्चोकको परिक्रमा गरी बिहान ११ः१५ बजे गैँडाकोटतर्फ पुगेको  थियो   ।

नवलपुरतर्फ गैँडाकोट पुल्चोकको गोपेश्वर महादेव मन्दिर, मौलाकालिका भगवती मन्दिर, वेदविद्याश्रम, शुकदेव भागवताश्रम, श्रीनिम्बाकाचार्य दर्शन केन्द्र, श्रीलक्ष्मीनृसिंह दिव्यधाम मन्दिर, बेसक्याम्प, केलादी क्षेत्र र हर्दी हुँदै पुनः तनहुँको देवपुरको साढेबगर बौद्ध गुम्बा, भूबराह मन्दिर हुँदै मणिमुकुन्देश्वर चक्रवर्ती आश्रममा आई समापन हुने कार्यक्रम रहेको क्षेत्र विकास समितिका सदस्य चन्द्रमित्र पण्डितले जानकारी दिनुभयो  । 
हजारौँ भक्तजन, सन्त–महन्त, धार्मिक व्यक्तित्व तथा स्थानीय सरकार प्रमुखहरूको सहभागिता रहेको नेपाल सन्त समाजले जनाएको छ । कार्यक्रमका संयोजक फडिन्द्र पौडेलका अनुसार देवघाटधामको महत्व र संसारकै प्रवित्र शालग्राममात्र पाइने नदी  कृष्णगण्डकी र देवताहरुको जमघट हुने देवघाटधामको महत्व विश्वमाझ चिनाउन महोत्सव प्रभावकारी हुने बताइएको छ । 
“देवघाटधाम गण्डकी परिक्रमा महोत्सव–२०८२” नाम दिइएको यस पदयात्राले ‘हाम्रो तीर्थ राम्रो तीर्थ’ भन्ने सुन्दर भावना फैलाउने उद्देश्य लिएको संयोजक पौडेलले बताउनुभयो । उहाँका अनुसार यसबाट आध्यात्मिक ऊर्जा प्राप्त हुनुका साथै देवघाटलाई परिवेष्ठित बनाउने दिव्यतम प्रकृति र जलाधारको संरक्षण गर्दै भावी पुस्तासम्म तीर्थ र जलसम्बन्धी महत्व हस्तान्तरण गर्नु पनि परिक्रमाको उद्देश्य हो । नेपाल सन्त समाजका अध्यक्ष स्वामी ज्ञानानन्द सरस्वतीका अनुसार देवघाटमा गण्डकी परिक्रमा विगतदेखि गरिँदै आएको भए पनि केही वर्ष रोकिएको थियो । विसं २०७८ सालदेखि यसलाई पुनः निरन्तरता दिइएको उहाँले बताउनुभयो ।

“यो परिक्रमा सिद्ध महात्मा र महापुरुषहरूको निर्देशनमा प्रारम्भ भएको हो,” उहाँले भन्नुभयो, “यसले जलसम्पदा र वनको रक्षा गर्नका साथै हाम्रो देवघाटलाई वैदिक धर्मावलम्बीहरूको प्रमुख धार्मिक धरोहरका रूपमा विश्वसामु प्रस्तुत गर्नेछ ।” उहाँका अनुसार यस परिक्रमाबाट आन्तरिक र बाह्य पर्यटन दुवै प्रवद्र्धन हुने, देवघाटको धार्मिक, प्राकृतिक र सांस्कृतिक महिमा अन्तर्राष्ट्रिय स्तरमा फैलिने र स्थानीय अर्थतन्त्रमा पनि सकारात्मक प्रभाव पर्नेछ । कार्यक्रममा, हरिहर सन्यास आश्रमका पीठाधीश ज्ञानानन्द सरस्वती  महाराज , महेश सन्यास आश्रमका पीठाधीश रमणानन्द गिरीजी महाराज, सन्यास आश्रमका पीठाधीश ईश्वरानन्द सरस्वती –माँ ईन्दिरा) पन्डित कुवेर सुवेदी ,पन्डित बालकृण्ण अर्याल,  जिल्ला समन्वय समिति चितवनका प्रमुख नारायण अधिकारी, भरतपुर उपप्रमुख चित्रसेन अधिकारी, गैँडाकोट नगरपालिका प्रमुख  मदनभक्त अधिकारी, देवघाट गाउँपालिका अध्यक्ष तिलबहादुर थापा ,देवघाटधाम क्षेत्र विकास समितिका अध्यक्ष डा. ईश्वरराज लौडारी , पूर्वअध्यक्ष शिवराज पौडेललगायतको उपस्थिति थियो।